ప్రపంచంలో వెళ్లకూడని 10 ప్రదేశాలు ఇవే!

సాంకేతికత ఎంత పెరిగినా, గూగుల్ ఎర్త్ ద్వారా ప్రపంచంలోని ఏ మూలనో చూడగలుగుతున్నా.. కొన్ని ప్రదేశాలు మాత్రం ఇప్పటికీ మానవ ప్రపంచానికి దూరంగా, అంతుచిక్కని రహస్యాలుగా మిగిలిపోయాయి. అత్యంత కట్టుదిట్టమైన భద్రత, ప్రాణాంతకమైన ప్రమాదాలు, పవిత్రమైన ఆధ్యాత్మిక కారణాలు, చారిత్రక సంరక్షణ వంటి అంశాల వల్ల ఈ ప్రదేశాలలోకి ప్రవేశం పూర్తిగా నిషేధించబడింది. ఆ ప్రదేశం లోపల ఏముందో తెలుసుకోవాలన్న కుతూహలం ప్రపంచవ్యాప్తంగా ఉన్నప్పటికీ, వాటి తలుపులు మాత్రం ఎప్పటికీ మూసే ఉంటాయి. అలాంటి 10 ప్రదేశాల గురించిన ఆసక్తికర కథనం ఇది.

1. ఏరియా 51, అమెరికా:
ఏరియా 51 పేరు వినగానే మనకు గుర్తుకొచ్చేవి గ్రహాంతరవాసులు (ఏలియన్స్), UFOలు. నెవాడా ఎడారిలో ఉన్న ఈ అత్యంత రహస్యమైన అమెరికన్ సైనిక స్థావరం, అత్యాధునిక విమానాలు, రక్షణ వ్యవస్థల పరీక్షలకు కేంద్రం. ఇక్కడికి దగ్గరగా వెళ్లడానికి ప్రయత్నించినా భారీ జరిమానాలు, అరెస్టులు తప్పవు. అందుకే దీని చుట్టుపక్కల ప్రాంతాన్ని "ఎక్స్‌ట్రాటెర్రెస్ట్రియల్ హైవే" నుండి మాత్రమే వీక్షించడానికి అనుమతిస్తారు.

2. చైయెన్నె మౌంటెన్ కాంప్లెక్స్, అమెరికా:
ప్రచ్ఛన్న యుద్ధ సమయంలో అణుదాడిని సైతం తట్టుకునేలా కొలరాడోలోని గ్రానైట్ పర్వతం లోపల నిర్మించిన భూగర్భ సైనిక సముదాయం ఇది. ఇక్కడే నార్త్ అమెరికన్ ఏరోస్పేస్ డిఫెన్స్ కమాండ్ (NORAD) కార్యకలాపాలు జరుగుతాయి. ఇది ప్రజలకు అందుబాటులో ఉండదు. కానీ, సమీపంలోని పార్కుల నుండి ఈ పర్వతాన్ని చూడవచ్చు.

3. రూమ్ 39, ఉత్తర కొరియా:
ఉత్తర కొరియా రాజధాని ప్యాంగ్‌యాంగ్‌లో ఉన్న ఈ రహస్య ప్రభుత్వ కార్యాలయం, ఆ దేశ పాలన కోసం అక్రమ మార్గాల్లో విదేశీ కరెన్సీని సంపాదిస్తుందని ఆరోపణలు ఉన్నాయి. కట్టుదిట్టమైన భద్రత ఉండే ప్రాంగణాలలో ఇది దాగి ఉంటుంది. ఉత్తర కొరియాకు వెళ్లే పర్యాటకులను కూడా ఈ ప్రాంతానికి చాలా దూరంగా ఉంచుతారు.

4. ది ఎలిఫెంట్స్ ఫుట్, ఉక్రెయిన్:
1986 చెర్నోబిల్ అణు విపత్తు తర్వాత ఏర్పడిన అత్యంత రేడియోధార్మిక వ్యర్థ పదార్థం ఇది. ఏనుగు పాదం ఆకారంలో ఉండటంతో దీనికి ఆ పేరు వచ్చింది. దశాబ్దాలు గడిచినా దీని దగ్గరకు వెళితే నిమిషాల్లో ప్రాణాలు పోతాయి. ప్రస్తుతం ఇది రియాక్టర్ లోపల సీల్ చేయబడింది. చెర్నోబిల్ ఎక్స్‌క్లూజన్ జోన్‌లోని కొన్ని సురక్షిత ప్రాంతాలకు మాత్రమే పరిమిత సంఖ్యలో పర్యాటకులను అనుమతిస్తారు.

5. స్నేక్ ఐలాండ్, బ్రెజిల్:
ఇది ప్రపంచంలోనే అత్యంత ప్రమాదకరమైన సర్పాలకు నిలయం. అంతరించిపోతున్న జాతికి చెందిన వేలకొద్దీ గోల్డెన్ లాన్స్‌హెడ్ వైపర్ పాములు ఇక్కడ నివసిస్తాయి. వీటి విషం అత్యంత తీవ్రమైనది. అందుకే బ్రెజిల్ ప్రభుత్వం ఈ ద్వీపంలోకి ప్రజల ప్రవేశాన్ని నిషేధించింది. కేవలం శాస్త్రవేత్తలు మాత్రమే ప్రత్యేక అనుమతితో వెళ్లగలరు. పడవల్లో తీరం నుండి దూరం గా ఉండి ద్వీపాన్ని చూడవచ్చు.

6. నార్త్ సెంటినల్ ఐలాండ్, భారత్:
ప్రపంచంతో ఎలాంటి సంబంధం లేకుండా వేల సంవత్సరాలుగా జీవిస్తున్న సెంటినలీస్ అనే ఆదిమవాసి తెగకు ఇది నివాసం. బయటి ప్రపంచంతో సంబంధాన్ని వారు తీవ్రంగా వ్యతిరేకిస్తారు. వారికి బయటి ప్రపంచం నుండి రోగాలు సోకకుండా, వారి జీవన విధానానికి ఆటంకం కలగకుండా ఉండేందుకు భారత ప్రభుత్వం ఈ ద్వీపానికి వెళ్లడాన్ని చట్టవిరుద్ధం చేసింది.

7. గంగ్ఖర్ పుయెన్సమ్, భూటాన్:
ప్రపంచంలో ఇప్పటివరకు ఎవరూ అధిరోహించని అత్యంత ఎత్తైన పర్వతం (7,500 మీటర్లు) ఇది. స్థానిక ప్రజలు ఈ పర్వత శిఖరాలను తమను రక్షించే దేవతల పవిత్ర నివాసాలుగా భావిస్తారు. వారి ఆధ్యాత్మిక విశ్వాసాలను గౌరవిస్తూ భూటాన్ ప్రభుత్వం ఈ పర్వతారోహణను నిషేధించింది. దీనిని ట్రెక్కింగ్ మార్గాల నుండి లేదా విమానాల నుండి వీక్షించవచ్చు.

8. ఇసే గ్రాండ్ ష్రైన్, జపాన్:
జపాన్‌లో అత్యంత పవిత్రమైన షింటో పుణ్యక్షేత్రం ఇది. సూర్య దేవత అమతెరాసు కోసం దీన్ని నిర్మించారు. ఇక్కడి గర్భగుడిలోకి కేవలం రాజ కుటుంబ సభ్యులు, ప్రధాన పూజారులు మాత్రమే ప్రవేశించగలరు. బయటి ప్రాంగణాలు సందర్శకులకు తెరిచి ఉంటాయి. ప్రతి 20 సంవత్సరాలకు ఒకసారి ఈ ఆలయాన్ని సంప్రదాయబద్ధంగా పునర్నిర్మిస్తారు.

9. క్విన్ షి హువాంగ్ సమాధి, చైనా:
చైనా మొదటి చక్రవర్తి సమాధి ఇది. ప్రపంచ ప్రసిద్ధి చెందిన టెర్రకోట సైన్యం ఈ సమాధిని కాపలా కాస్తుంటుంది. సమాధి లోపల పాదరసం అధిక స్థాయిలో ఉండటం, పురావస్తు సంపదను కాపాడాలనే ఉద్దేశంతో దీనిని ఇప్పటివరకు తెరవలేదు. పర్యాటకులు టెర్రకోట సైన్యాన్ని, చుట్టుపక్కల ప్రాంతాలను సందర్శించవచ్చు.

10. పోవెగ్లియా ఐలాండ్, ఇటలీ:
వెనీషియన్ లాగూన్‌లోని ఈ చిన్న ద్వీపానికి ఓ చీకటి చరిత్ర ఉంది. ఒకప్పుడు ప్లేగు వ్యాధిగ్రస్తులను ఇక్కడ ఉంచి, ఆ తర్వాత మానసిక వైద్యశాలగా మార్చారు. ఇక్కడ దెయ్యాలు తిరుగుతాయని, భవనాలు శిథిలావస్థలో ఉన్నాయని వదంతులు ఉన్నాయి. ప్రమాదకరంగా మారడంతో ప్రభుత్వం దీన్ని అధికారికంగా మూసివేసింది.

ఈ ప్రదేశాలన్నింటికీ ప్రవేశం లేకపోవడమే వాటిపై ఆసక్తిని, రహస్యాన్ని మరింత పెంచుతోంది. అందుకే "పెరిమీటర్ టూరిజం" అనే కొత్త పర్యాటక విధానం ప్రాచుర్యం పొందింది. అంటే, చట్టబద్ధంగా ఎంతవరకు వెళ్లవచ్చో అంతవరకు వెళ్లి ఆ ప్రదేశాలను దూరం నుంచే వీక్షించడం. భద్రత, గౌరవం లేదా ప్రమాదం.. కారణం ఏదైనా, కొన్ని రహస్యాలు మానవుడికి అంతుచిక్కకుండా ఉంటేనే వాటికి విలువ.